究竟10年後，電飯煲有沒有重大改變？

其實係冇乜，不過電器用咗10年始終都有啲老化，係時候 upgrade 下。 不過真係要讚下日立嘅電器，用咗咁耐仍然運作正常，真心俾個 like 佢。

環觀整個香港電飯煲市場，十年過去我敢講係一潭死水。香港人鐘意追潮流，買名牌，揸靚車，用最新型號手電，但係番到屋企都係交俾家傭洗米煮飯，真係自己都唔知食緊乜米。

十年前各大家電踴躍將 IH 電飯煲引入香港，心諗香港人嘴尖，一定衝去 upgrade 屋企個電飯煲。點知十年過去，大部份人寧願每年花幾萬買新電話手袋手錶去旅行，都唔肯俾幾千換個IH電飯煲。我之前去電器鋪選購新電飯煲，十年前嘅款仲未賣晒，日立不再引入新款電飯煲，Panasonic 好啲嘅貴到嚇親人，Tefal、Philips 鬼佬牌子亂入混水摸魚，真係唔相信香港大部份人係食米嘅。

我今次揀咗東芝 Toshiba，市面上我覺得佢功能外表贏晒，最得我歡心。美味模式需時55分鐘，煮出來的飯軟熟粘口美味，特快模式25分鐘內煮好，效果唔錯。

買 IH 電飯煲要留意以下幾點：

  1. 如果無壓力，是低技術型號，買小米好過。壓力可以縮短煮飯時間，令飯煮得更熟更軟綿綿，糙米都可以煮到同白飯一樣咁軟熟。
  2. 壓力可調節，配合不同煮飯時間和米類。
  3. 有埋真空更好。通常煮飯前要浸水，讓米粒吸收水分，通常起碼一個鐘左右，視乎米類別和室溫。在真空情況下，水分會被谷入米粒內，在短時間內完成水分吸收。真空亦可幫助延長保溫時間，令米飯仍然維持濕潤，最長可達40小時。
  4. 釜鍋最好有特別堅硬塗層，可以在鍋內洗米。