有三個品牌，你用佢哋產品，碳排放多極有限。

第一個我要介紹係 Patagonia。

我都唔記得幫襯咗佢幾耐，起碼超過二十幾年。行山唔多用佢啲產品，反而多出街 casual 著。Patagonia 以前和 Polartec 係親密合作伙伴，Polartec 最新物料會率先獨家給 Patagonia 使用，所以年青奔放嘅我先被 Patagonia 嘅 fleece jacket 吸引到。

慢慢我被 Patagonia 嘅環保激進態度吸引到。

如果你好似我咁買衫會 check 吓原材料有幾多成是再生物料，究竟原材料生產商是不是負責任 sustainable，你係 Patagonia 會買得好安心同好多選擇。我現在買衫褲鞋襪，會盡量揀使用超過一半再生物料製成的產品。

多謝 Patagonia 搞到我成身膠樽魚網碎布線頭。

話樣嘢俾你知，Patagonia 應該係香港第一個服裝品牌認真負責任回收自家產品。我還記得很久以前第一次拿一件中古 fleece jacket 去門市回收，搶購中嘅師奶以為我攞件衫嚟整，店員覺得我型到爆給予我肯定同致敬嘅眼神。