Cheapの蓮 評分：三星

香港就係咁有驚喜咁有趣。

當我食過 HKD 12 熱狗套餐，以為本地飲食業已經玩完，大家樂嘅招牌焗新菜式「阿拉斯加鱈魚柳茄汁焗飯」俾番我希望。

招牌焗元祖菜式「一哥焗豬扒飯」我一向好欣賞。一來好 Hong Kong style 啱晒我香港仔，二來量產渣古製作方式，由叫餐到阿姐 pack 好遞俾你唔駛5分鐘，做到咁嘅味道同賣相，我以 home cook 嘅身份可以肯定一啲都唔容易。

新推出嘅「阿拉斯加鱈魚柳茄汁焗飯」，相中炸魚柳長過盒焗飯，俾食肆呃慣嘅就知，一認真就輸。攞番公司開飯，發現魚柳同飯要分開上，條魚柳真係長過盒飯！焗飯好足料，差不多係「一哥焗豬扒飯」走豬扒，yum！條魚柳好港式吉列，好脆，粉唔算多，魚柳唔「削」，啱啱熟，配港式白色綠點沙律醬，yum yum！

我好喜歡 Fish and Chips，但作為香港仔，心諗如果有 Hong Kong Style Fish and Rice 就正，beer battered 變港式吉列，薯條變港式茄汁焗飯，價錢平一半，咁就「娃呢谷」。

大家樂實現了我夢想。