Cheapの蓮 評分：三星
有一日 Fiona send 一張相來告訴我晏晝食南記酸辣米線，我立刻回應：「乜碗嘢咁核突！」
很久以前我第一次食南記，選了普通魚蛋粉，真係100%平平無奇，從此緣盡。轉眼到現在，Fiona 某周末中午話好想食南記，我就再次俾機會佢。
首先要讚佢嘅網上外賣自取 flow 滑到漏油。經南記官方網站可連結到外賣自取網頁，自動找出最近你現在位置嘅分店。揀嘢食，可以標明走餐具，跟住 Apple Pay 找數，跟住告知你外賣幾耐完成。到達分店，完全不用排隊，自己走去 counter 側面找出阿姐已窩心為你印出來的外賣單，走到出菜窗口，跟單號找到外賣。比起譚仔或譚仔三哥的無限輪迴等，簡直係光速外賣。
等待雖然痛苦，但始終最緊要係食物，好食嘅話等耐啲都冇所謂。
南記酸辣米線 by default 湯餸分開，坑渠水還坑渠水，廚餘還廚餘。老實講，賣相唔俾負分已經算係咁。當你將兩樣嘢倒埋一齊，食第一啖，oh my god，媽媽講得冇錯，越冇益越核突嘅食物真係越好味！相比之下，譚仔集團嘅酸辣米線簡直係有益身心嘅清湯米線，味覺視覺嘅衝擊完全比下去。
你明知每日食佢一定會三高死，但係你真係好想每日都食！🤣😈