［家電開箱］完美風扇⋯⋯ 係小米唔係 Dyson！

夏日炎炎，Dyson Pure Cool 風扇遙控打柴，一身大汗回到家，用遙控器開風扇好似抽奬咁，㩒十下有一下得，真係火熱動感 DLS🔥。

本來捻住換遙控器，發覺要幾百蚊，偶然發現用同樣價錢，買到小米 1X 直流企扇。上網爬文，好評如潮，有冇搞錯，一定係KOL業配，等我去豐澤買一個回來試一試（舊 Dyson 二手放出）。

包裝非常企理，組裝簡易，以我家品男玩過不少高價位風扇，小米設計和品質完全超出預期… 咁好，消委會真係要點名指摘，咁樣做生意簡直係賤價傾銷壟斷市場，邊有人會買其他牌子！

接駁電源開動，用 iPhone app 接上家居網絡。媽的，居然風力有100 檔微調，我以前 Dyson 風扇貴十倍，十檔風力都無，仲要最高幾檔太嘈根本用唔着。由手機 app 可以控制所有功能，隨意轉頭、轉向角度選擇、時間制等等，唯一做唔到係叫部風扇行過嚟。小米風扇風力強，但好靜，靜到我初時以為佢壞咗無著。

如果你仍堅持話 Dyson 好啲，ok，單挑可能輸，因為小米冇空氣清新功能。以 Dyson 價錢，可以買五部小米風扇加一部空氣淨化機，仲有二千多元剩，呢個陣容冇得輸啩？

如果你都仲係話 Dyson 好啲，你真係需要買一部風扇，因為你個腦熱壞咗。