牙齒護理非常重要，你唔好以為可以戴一世口罩遮住棚爛牙！🤣
刷牙可以分幾個級數。入門級，買牙刷同牙膏，每日兩次起勢咁刷。Good job，你已經比原始人走前一大步，踏入文明社會。
Come on，你點會滿足於超越原始人？中級，使用電動牙刷每日輕鬆刷兩次。係呢一級內又會細分唔同 grade，視乎你用哪類電動牙刷同刷頭，相信讀者中很多已超越原始人很多年，不費時詳述。
高級，使用牙線。相信大家都有類似經歷：
洗完牙俾牙醫洗到「立立令」成口牙血，驚魂稍定後牙醫苦口婆心教你用牙線，強調好易用。你雄心壯志去萬寧買全新牙線（其實屋企有個上年買差不多全新）。幾日後你屋企又多一盒差不多全新嘅牙線放一年。
Honestly，牙線真係好麻煩好難掌握，如果你正在箍牙更加唔使諗，除非你好懷念細個同你閨蜜玩解繩。
有一樣牙齒護理 gadget 叫水牙線，其實出咗好耐，你依家先知無問題，因為頭幾代得啖笑，同用水槍對住自己口射無分別。最新的有手提同座枱，主要品牌有 Oral B、Panasonic 同 Philips。Oral B 力度最弱，可以 skip。Philips 最靚仔，但佢出蠱惑用氣槍加水槍，力度夠但不是連貫水柱，係三發連射，唔暢快清潔效果到喉唔到肺。
剩返 Panasonic。手提方便攜帶去旅行都用得，又幾夠力，但有兩個缺點，第一水箱容量始終有限，要中途加水，第二好大嚿好唔靚仔，用嗰陣時唔瀟灑。我們做了資料蒐集，買了座枱型號，你估唔到佢居然係香港最受歡迎。水箱容量充足，力度澎湃，十度全開我估假牙都射甩。唯一缺點不能攜帶，佔用空間多，但好彩佢外型都幾靚仔。
至於效果如何？真係射甩牙縫間食物殘渣出嚟，感覺有如去完牙醫洗牙，但無成口血，即刻可以充滿自信露齒笑。