雖然蒲台島被稱為香港南極，其實要去玩不是太困難。

交通只有一個選擇，就是街渡，由翠華船務營運（係翠華餐廳不能預購船票，完全冇關係），上船點是香港仔或赤柱。去香港仔碼頭可以先到黃竹坑港鐵站，再轉專線小巴，全程約1小時有多。赤柱上船位係卜公碼頭，可以由銅鑼灣搭專線小巴前往赤柱，或西灣河一出港鐵站搭新巴14號巴士，船程約半小時。周末假期多人搭船，會有加班船，預半小時前到碼頭便可。

蒲台島面積不大，行正式郊遊徑4小時內可輕鬆完成。碼頭一落船，右手面行是往126燈塔捷徑，粉紅色灣仔士多側面一條窄巷便是起點。不久便到達岩石海邊，經過千年石刻（要驚分叉路行落去），半小時腳程已經差不多到昂裝半島。昂裝有很多奇岩怪石，如僧侶石、烏龜石、五指石等。大部分人都選擇在那裏露營，燈塔位於最高點。沿岩石一路行出去，可以去到整個島最南端。

由昂裝向北行，爬上九百級樓梯，便會到達觀日亭。行一小段山路會到達一個分叉路口，你可以選擇直接返碼頭，或往島西面行一轉然後返碼頭。往西面山路比較崎嶇，難度兩星，路程約個半小時，冇退出點冇遮擋冇士多冇豆腐花。

碼頭附近有兩個地方可以醫肚，輕食可以去粉紅色灣仔士多，紫菜餐蛋公仔麵聞名全島。豪食可以去離碼頭5分鐘左右嘅海鮮酒家，假日會坐滿，要有心理準備等位。